Rəqəmsal transformasiya qlobal idarəetmə praktikalarının bütün səviyyələrinə təsir göstərərək menecmentin mahiyyətini yenidən müəyyənləşdirir. Süni intellektin, böyük verilənlərin analitikasının, avtomatlaşdırılmış qərarvermə sistemlərinin və hibrid iş modellərinin sürətli inkişafı müasir təşkilatlarda strateji liderlik üçün zəruri bacarıqların strukturunu dəyişir. Bu proses nəticəsində menecerlər təkcə ənənəvi idarəetmə funksiyalarını icra edən şəxs deyil, həm də texnoloji yenilikləri mənimsəyərək dəyişiklikləri idarə edən, çevik və məlumat əsaslı qərarlar qəbul edən liderlərə çevrilirlər. Tədqiqatın məqsədi rəqəmsal transformasiya dövründə menecer bacarıqlarının necə yenidən formalaşdığını təhlil etmək, təşkilatların rəqəmsal mühitə uyğunlaşma səviyyəsini qiymətləndirmək və Azərbaycan müəssisələri üçün praktik təkliflər irəli sürməkdir. Təhlil göstərir ki, rəqəmsal liderlik modeli psixoloji təhlükəsizliyin təmin edilməsi, innovativ düşüncənin təşviqi, həmçinin rəqəmsal savadlılıq və məlumatların interpretasiyası bacarıqlarının inkişafını tələb edir. Məqalədə həmçinin rəqəmsal dövrdə idarəetmənin strateji istiqamətləri, insan resurslarının transformasiyası və təşkilati mədəniyyətin yenilənməsi məsələləri də araşdırılır. Nəticələr göstərir ki, rəqəmsal transformasiya yalnız texnoloji deyil, həm də institusional və mədəni dəyişikliklər tələb edən kompleks prosesdir və menecment sahəsində yeni kompetensiya çərçivəsinin formalaşdırılmasını zəruri edir.