Bu tədqiqat universitetlərin innovasiya ekosistemində, texnologiya transferində və startap fəaliyyətinin inkişafında oynadığı strateji rolu araşdırır. Müasir dövrdə universitetlər yalnız tədris və tədqiqat mərkəzləri deyil, həm də biliklərin kommersiyalaşdırıldığı, yeni texnologiyaların yarandığı və iqtisadiyyatın inkişafına töhfə verən aparıcı institusional aktora çevrilmişdir. Universitet–sənaye–dövlət əməkdaşlığını izah edən “Triple Helix” modeli göstərir ki, innovasiya prosesinin səmərəliliyi bu üç aktorun qarşılıqlı əlaqəsindən asılıdır. Universitetlər bilik və tədqiqat yaradır, sənaye bu bilikləri məhsula və texnoloji innovasiyaya çevirir, dövlət isə hüquqi və institusional çərçivə yaradaraq innovasiya mühitini stimullaşdırır. Bununla yanaşı, startap ekosistemlərində universitetlərin rolu-inkubatorlar, texnoparklar, laboratoriyalar və spin-off şirkətləri vasitəsilə-yeni biznes subyektlərinin və texnologiyaların yaranmasını sürətləndirir. İnsan kapitalının inkişafı, rəqəmsal transformasiya, tədqiqat nəticələrinin kommersiyalaşdırılması və bilik transferi milli innovasiya sisteminin əsas dayaqlarını formalaşdırır. Tədqiqat göstərir ki, universitet–sənaye əlaqələrinin gücləndirilməsi iqtisadi rəqabətqabiliyyəti artırır və yüksək texnologiyalı iqtisadiyyatın formalaşmasını təmin edir.