Müasir dövrdə qlobal ərzaq təhlükəsizliyinin təmin edilməsi, resurslardan səmərəli istifadə və kənd təsərrüfatının rəqabət qabiliyyətinin artırılması ölkələrin strateji inkişaf prioritetləri sırasında mühüm yer tutur. Bu baxımdan aqroparkların yaradılması və idarə olunması kənd təsərrüfatının modernləşdirilməsində effektiv mexanizm kimi çıxış edir. Məqalədə aqroparkların idarə edilməsində strateji planlaşdırmanın əhəmiyyəti, innovativ idarəetmə metodlarının tətbiqi və rəqəmsal texnologiyaların rolu təhlil edilmişdir. Araşdırma göstərir ki, strateji planlaşdırma resursların optimal bölüşdürülməsinə, risklərin idarə olunmasına və istehsal zəncirinin səmərəliliyinin artırılmasına şərait yaradır. Eyni zamanda, rəqəmsal platformalar, ağıllı suvarma sistemləri, avtomatlaşdırma və data-analitika aqroparkların dayanıqlı inkişafını və iqtisadi effektivliyini əhəmiyyətli dərəcədə yüksəldir. Məqalənin nəticələri aqropark modelinin müasir kənd təsərrüfatı siyasətində strateji əhəmiyyətə malik olduğunu göstərir.