Bu tədqiqatda Kiçik və Orta Biznesin (KOB) Azərbaycanın iqtisadi inkişafındakı rolu və iqtisadi səmərəliliyi araşdırılmışdır. KOB-lar ölkədə sahibkar subyektlərinin təxminən 99.6-99.7 %-ni təşkil edir və 2023-cü ildə onların sayı 401 149-a çatmışdır. Bu subyektlərin məşğulluqda payı 44 %, əlavə dəyərdə payı isə 18 %-dir, bu isə onların iqtisadiyyata əhəmiyyətli töhfəsini göstərir.

İqtisadi səmərəlilik prinsipləri - allokativ, produksiya və dinamik səmərəlilik - KOB-ların çevik fəaliyyətində və resurslardan maksimum fayda əldə etməsində əks olunur. KOB-lar resursların səmərəli istifadəsini təmin edir, məşğulluğu artırır və iqtisadi diversifikasiyanı gücləndirir. OECD və yerli KOBİA statistikaları göstərir ki, Azərbaycan KOB-larının potensialı tam reallaşdırılmamışdır və dövlət dəstəyi, rəqəmsallaşma və innovativ idarəetmə strategiyaları ilə onların rolu daha da artırıla bilər.

Nəticədə, KOB-lar Azərbaycanın iqtisadi inkişafının əsas dayaqlarından biri olmaqla, resursların səmərəli istifadəsi və iqtisadi səmərəliliyin yüksəldilməsi baxımından strateji əhəmiyyət kəsb edir.