Məqalədə biznes mühitində innovativ idarəetmənin tətbiqinin genişləndirilməsi istiqamətləri, rəqəmsal transformasiyanın təsirləri və Azərbaycan iqtisadiyyatında mövcud vəziyyət təhlil edilmişdir. Qlobal rəqabətin güclənməsi, texnoloji yeniliklərin sürətlənməsi və bazar münasibətlərinin mürəkkəbləşməsi müəssisələrdə çevik, məlumat əsaslı və yaradıcılığa söykənən idarəetmə modellərinin tətbiqini zəruri edir. Araşdırma göstərir ki, innovativ idarəetmə resurslardan səmərəli istifadəni, əmək məhsuldarlığının yüksəlməsini, istehsal və xidmət proseslərinin optimallaşdırılmasını və strateji qərarların operativ qəbulunu təmin edir. Dövlət Statistika Komitəsinin rəqəmsal inkişaf göstəriciləri əsasında ölkədə rəqəmsallaşma üçün əlverişli şərait olduğu müəyyən edilmişdir: internet istifadə səviyyəsinin yüksəkliyi, KOS-ların iqtisadi sistemdə üstünlük təşkil etməsi və İKT xərclərinin artması innovativ idarəetmə modellərinin genişlənməsi üçün baza yaradır. Lakin R&D xərclərinin məhdudluğu, regionlararası rəqəmsal fərqlər, KOS-ların investisiya imkanlarının zəifliyi və menecerlərin rəqəmsal bacarıqlarının məhdudluğu kimi problemlər mövcuddur. Nəticə olaraq, məqalədə rəqəmsal liderlik təlimlərinin genişləndirilməsi, innovativ idarəetmə dəstək fondunun yaradılması, universitet-biznes əməkdaşlığının gücləndirilməsi, regionlarda innovasiya mərkəzlərinin qurulması və dövlət müəssisələrində rəqəmsal idarəetmə standartlarının tətbiqi kimi prioritet təkliflər irəli sürülmüşdür.